Mae ymchwil i ddarganfod mwy am y bobl sy’n gweithio gyda data yng ngwasanaethau cymdeithasol awdurdodau lleol wedi datgelu’r cyfleoedd a’r heriau mwyaf y maent yn eu hwynebu.
Canfu Social Finance, cwmni ymgynghori di-elw a gynhaliodd yr ymchwil hwn ar ein rhan, fod gan weithwyr ystod eang o sgiliau data cyffredinol ond bod angen mwy o gymorth arnynt i ddod yn fedrus wrth gasglu data gofal cymdeithasol. Canfu hefyd fod llawer o ddadansoddwyr data yn dibynnu ar ddatblygu sgiliau yn y gweithle yn hytrach na chael hyfforddiant ffurfiol.
Mae’r ymchwil yn parhau â gwaith ein hymagwedd strategol at ddata gofal cymdeithasol yng Nghymru. Daeth â mwy nag 80 o bobl ynghyd o awdurdodau lleol, gofal iechyd, addysg uwch a sefydliadau’r llywodraeth ledled Cymru a gymerodd ran mewn gweithdai, cyfweliadau ac arolwg.
Dywedodd Owen Davies, ein Rheolwr Data a Gwybodaeth: “Roedd gennym ddiddordeb mewn dysgu mwy am y bobl sy’n gweithio ym maes data o fewn gwasanaethau cymdeithasol mewn awdurdodau lleol, felly ar ddechrau 2022 fe wnaethom gomisiynu Social Finance i ymchwilio i hyn.
“Yn benodol, roedden ni eisiau darganfod sut mae pobl yn dod i weithio mewn rolau data gofal cymdeithasol, sut maen nhw’n ennill sgiliau a pha gyfleoedd sydd ganddyn nhw ar gyfer datblygiad proffesiynol parhaus a dilyniant gyrfa. Roeddem hefyd eisiau gwybod a fyddai’n ddefnyddiol cyflwyno fframwaith datblygiad proffesiynol ffurfiol i helpu i wella sgiliau pobl.”
Canfu’r ymchwil dystiolaeth o ystod o sgiliau a galluoedd ar gyfer defnyddio data’n effeithiol a bod gwasanaethau cymdeithasol yng Nghymru yn rhannu nifer o’r un problemau â sgiliau data â llawer o sefydliadau sector cyhoeddus eraill.
Ychwanegodd Owen Davies: “Dywedodd y rhan fwyaf o ddadansoddwyr wrthym eu bod wedi dysgu eu sgiliau yn y gwaith, gan fod cyfleoedd hyfforddi i ddadansoddwyr data yn gallu bod yn ddrud. Canfuom hefyd nad yw rheolwyr timau data bob amser yn deall pa gyrsiau y dylent anfon eu staff arnynt a bod y cyrsiau mewnol a gynigir yn ymdrin â phynciau fel llywodraethu data yn unig.
“Canfu’r ymchwil hefyd fod y dadansoddwyr data angen sgiliau data technegol a gwybodaeth dda am ofal cymdeithasol i fod fwyaf llwyddiannus. Gall fod yn anodd i gasglu’r wybodaeth yma heb llawer o brofiad yn y swydd.”
Mewn ymateb i ganfyddiadau’r ymchwil, mae’r adroddiad yn cynnwys argymhellion a allai helpu i gefnogi pobl sy’n gweithio ym maes data o fewn gofal cymdeithasol. Mae’r argymhellion yn cynnwys cyflwyno cyfres o brosiectau ar raddfa fach, megis creu llyfrgell o adnoddau hyfforddi a thorfoli swydd ddisgrifiadau i weld a yw hyn yn helpu’r gweithlu i ddatblygu.
Mae’r canfyddiadau a’r argymhellion llawn yn yr adroddiad terfynol, sydd ar gael i’w lawrlwytho isod.