Ymarferydd gwasanaethau cymdeithasol

Mae ymarferydd gwasanaethau cymdeithasol yn gweithio mewn partneriaeth ag asiantaethau a gweithwyr proffesiynol eraill i hyrwyddo canlyniadau sy’n canolbwyntio ar y person ar gyfer unigolion sydd ag anghenion gofal a chymorth ac mewn cymunedau. Bydd yn cynnwys rhai cyfrifoldebau am gynllunio ac asesu gofal ffurfiol a chymorth.

Mae yna hefyd ystod o rolau eraill o fewn y gweithlu Gwybodaeth, Cyngor a Chymorth (IAA) ehangach nad oes ganddyn nhw gyfrifoldebau dros gynllunio ac asesu gofal a chymorth ffurfiol. Mae dysgu ar gyfer y rhan hon o'r gweithlu yn cael ei archwilio ar hyn o bryd.

Diweddariad olaf: 22 Tachwedd 2023

Nid oes angen cofrestru

Gofynion eraill

Os bydd ymarferydd gwasanaethau cymdeithasol yn cynnal asesiadau, dylai’r awdurdod lleol sicrhau bod ganddo’r sgiliau, yr hyfforddiant a’r cymwysterau priodol i wneud hynny.

Mae'r lefelau priodol o gymwysterau ar gyfer gwneud y gwaith hwn yn cynnwys y canlynol:

naill ai ymarferydd gwaith cymdeithasol neu ymarferydd gofal cymdeithasol cofrestredig gyda chymhwyster proffesiynol lefel 5 neu uwch
neu rywun gyda chymhwyster gofal cymdeithasol lefel 4 neu uwch, sy'n cynnwys gwybodaeth a sgiliau i gynnal asesiadau sy'n canolbwyntio ar yr unigolyn, o dan oruchwyliaeth ymarferydd gofal cymdeithasol neu ymarferydd gwaith cymdeithasol cofrestredig.

Hefyd, mae angen i’r awdurdod lleol fod yn fodlon bod gan yr holl staff sy’n ymgymryd â'r gweithgareddau hyn y sgiliau, yr wybodaeth a’r cymhwysedd i weithio gyda phlant a phobl ifanc, oedolion a gofalwyr, fel sy'n briodol.

Does dim cymwysterau blaenorol cydnabyddiedig ar gyfer y rôl yma. Os mae ymarferydd gwasanaethau cymdeithasol yn meddu ar gymhwyster gwahanol i:

Tystysgrif AU y Brifysgol Agored mewn Ymarfer Gofal Cymdeithasol (Cymru) a City and Guilds Lefel 4 Ymarferydd Gwasanaethau Cymdeithasol.

yna cyfrifoldeb y cyflogwr yw hi i wneud y penderfyniad os yw’r cymhwyster yna’n cwrdd ag anghenion ar gyfer cynnal asesiadau yn unol â Deddf Gofal Cymdeithasol a Llesiant (Cymru) ac unrhyw Godau Ymarfer.

Gofynion sefydlu

Mae Fframwaith sefydlu Cymru gyfan ar gyfer iechyd a gofal cymdeithasol wedi'i greu ar gyfer gweithwyr gofal cymdeithasol a gweithwyr cymorth gofal iechyd. Mae'n ymdrin â gofal a chymorth i oedolion, a phlant a phobl ifanc. Mae’n cynnig strwythur ar gyfer sefydlu pawb ym maes iechyd a gofal cymdeithasol ledled Cymru, ac mae’n amlinellu’r wybodaeth a’r sgiliau y mae angen i weithwyr newydd eu meithrin yn ystod eu chwe mis cyntaf yn y swydd.

Mae’n ddyletswydd ar bob cyflogwr i sicrhau bod ei weithwyr newydd yn cael hyfforddiant sefydlu priodol, gan ddefnyddio'r fframwaith hwn. Mae’n bosibl bod y rôl, y sefydliad neu'r sector yn newydd i'r gweithwyr.