Grŵp B

Gweler disgrifiad o'r grŵp hwn yn y Safonau hyfforddiant, dysgu a datblygu cenedlaethol.

Mae ymarferwyr Grŵp B yn gweithio gyda phobl mewn lleoliad grŵp neu ar sail un-i-un.

Mae'r grŵp hwn yn cynnwys ymarferwyr sydd neu nad ydynt wedi'u cofrestru neu eu rheoleiddio, a gwirfoddolwyr.

Bydd ganddynt gyfrifoldeb arbennig i'r bobl y maent yn gweithio gyda nhw.

Bydd angen lefel uwch o wybodaeth arnynt na phobl yng ngrŵp A oherwydd pa mor agos y maent yn gweithio gyda phobl.

Efallai y bydd gan y bobl y maent yn gweithio gyda nhw bryderon diogelu neu beidio.

Os oes pryderon diogelu, bydd llinell hysbysu glir yn y sefydliad.

Byddant yn ymwybodol o’u cyfrifoldeb i hysbysu am bryderon, yn fewnol ac yn uniongyrchol i’r gwasanaethau cymdeithasol.

Egwyddorion cofiadwy

Yn ôl y safonau, dylai pobl yng ngrŵp B wybod:

am ddeddfwriaeth, polisïau cenedlaethol, a chodau ymddygiad ac ymarfer proffesiynol ynghylch diogelu
sut i weithio mewn ffyrdd sy'n diogelu pobl rhag camdriniaeth, niwed ac esgeulustod
am y ffactorau, sefyllfaoedd a gweithredoedd a allai arwain neu gyfrannu at gamdriniaeth, niwed neu esgeulustod
sut i hysbysu, ymateb a chofnodi pryderon neu honiadau sy'n ymwneud â diogelu.

Byddant eisoes wedi cwblhau dysgu grŵp B.

Ar ddiwedd gweithgaredd dysgu, fe fyddan nhw’n:

gwybod y ddeddfwriaeth a'r polisïau perthnasol, codau ymddygiad ac ymarfer proffesiynol sy'n adlewyrchu eu rôl mewn perthynas â diogelu
gallu disgrifio sut i weithio mewn ffyrdd sy'n diogelu pobl rhag camdriniaeth, niwed ac esgeulustod
gwybod sut i fod yn chwilfrydig pan fyddant yn dyst neu’n amau camdriniaeth, niwed neu esgeulustod, neu os bydd rhywun yn dweud eu bod yn cael eu cam-drin
gallu esbonio ffactorau, sefyllfaoedd a gweithredoedd a allai arwain neu gyfrannu at gamdriniaeth, niwed neu esgeulustod
gwybod sut, pryd ac i bwy i hysbysu am wahanol fathau o gamdriniaeth, esgeulustod a niwed.

Rydym yn argymell yn gryf ddysgu cyfunol ar gyfer grŵp B.

Bydd hyn yn cynnwys hyfforddiant ar-lein sylfaenol, ystafell ddosbarth rithwir ac addysgu a dysgu wyneb yn wyneb.

Dylai'r adnoddau a'r dulliau dysgu adlewyrchu gwybodaeth a chymhwysedd ar gyfer rôl a chyfrifoldebau ymarferwyr yn y grŵp hwn. Maent yn cynnwys:

llyfrau gwaith cyn ac ar ôl y cwrs, gwybodaeth ysgrifenedig, fideos, podlediadau a deunyddiau eraill (i gyd o ffynhonnell ddibynadwy)
goruchwyliaeth un-i-un, mentora a chefnogaeth rheoli ar gyfer trafodaeth a myfyrio ar arfer
cysgodi, cyfarfodydd tîm a grwpiau cefnogaeth cymheiriaid
ymarferion hyfforddi gan gynnwys astudiaethau achos ac adolygiadau ymarfer
mae gan Fframwaith sefydlu Cymru gyfan ar gyfer gweithwyr iechyd a gofal cymdeithasol lyfr gwaith diogelu i helpu ymarferwyr i ddeall eu rôl a’u cyfrifoldeb dros ddiogelu pobl, ac mae’n annog ymarfer myfyriol a myfyrio ar yr hyn a ddysgwyd
adnoddau i ymarferwyr gofnodi dysgu a datblygiad.

Pethau eraill i'w hystyried

Mynediad at offer TG, a ffyrdd o hyfforddi pobl na allant gael mynediad at hyfforddiant ar-lein.
Rhoi ardystiad neu achrediad hyfforddiant ar gwblhau (neu gydnabyddiaeth arall), fel y gall ymarferwyr drosglwyddo hyfforddiant a dysgu wrth newid rolau.
Adolygiad goruchwyliwr neu fentor, a chadarnhad o wybodaeth, dealltwriaeth a chymhwysedd yr ymarferydd.

O leiaf chwe awr o hyfforddiant i gwmpasu'r canlyniadau dysgu.
Dylai gweithwyr newydd heb unrhyw hyfforddiant diogelu blaenorol gael hyfforddiant yn ystod pythefnos neu bedair wythnos gyntaf eu cyflogaeth neu wirfoddoli, neu o leiaf o fewn cyfnod prawf rôl newydd (chwe mis).
Efallai y bydd hyfforddiant ychwanegol hefyd ar bynciau penodol i'r rôl.
Dylai hyfforddiant, dysgu a datblygiad gloywi fod yn:
- lleiafswm o chwe awr
- yn barhaus dros gyfnod o dair blynedd
- wedi’i wneud os oes newid i ddeddfwriaeth diogelu
- wedi’i wneud fel sy'n ofynnol gan gyflogwr neu asiantaeth
ar bynciau penodol i'r rôl.
Dylai hyfforddiant, dysgu a datblygiad ganolbwyntio ar fyfyrio a datblygu gwybodaeth a sgiliau diogelu sy'n gysylltiedig â'r rôl.