Arolwg Dweud Eich Dweud 2024

Rydyn ni’n lansio ein harolwg Dweud Eich Dweud diweddaraf ym mis Ionawr 2024.

Yn union fel yn 2023, rydyn ni’n gofyn i bob gweithiwr gofal cymdeithasol cofrestredig ateb cwestiynau am bethau fel iechyd a llesiant, tâl ac amodau, a beth ydych chi'n ei hoffi am weithio yn y sector.

Rydyn ni'n gobeithio bydd y nifer mwyaf posibl yn cwblhau'r arolwg byr, o ystod eang o rolau gofal cymdeithasol.

Bydd yr arolwg ar gael ar-lein am chwech wythnos, a byddwn ni’n ysgrifennu atoch chi i roi mwy o wybodaeth am sut i gymryd rhan pan fydd yn mynd yn fyw ym mis Ionawr. Bydd y ddolen ar gael hefyd ar y dudalen hon.

Bydd rhannu eich meddyliau yn helpu i lunio'r gefnogaeth rydyn ni a'n partneriaid yn ei gynnig, felly peidiwch â cholli'ch cyfle i ddweud eich dweud.

Bydd pawb sy'n cwblhau'r arolwg yn cael eu cynnwys mewn raffl i ennill un o 25 taleb siopa gwerth £20.

Rydyn ni’n cynnal yr arolwg hwn eto fel y gallwn ni ddechrau monitro tueddiadau o ran beth mae pobl yn ei feddwl am weithio ym maes gofal cymdeithasol.

Hyd yn oed os ydych wedi gadael y sector, hoffen ni glywed am eich profiadau os ydych yn dal i fod wedi cofrestru. Bydd cyfle yn ystod y broses i chi rannu eich meddyliau.

Rydyn ni hefyd eisiau darganfod mwy am rai o'r themâu a ddaeth i'r amlwg o arolwg eleni i roi darlun sy’n fwy manwl i ni o'r hyn sy'n digwydd.

Un o'r ffyrdd y byddwn ni’n gwneud hyn yw drwy gynnal cyfweliadau a grwpiau ffocws gyda gweithwyr a chyflogwyr. Os hoffech chi gymryd rhan yn y cyfweliadau neu'r grwpiau ffocws, gallwch chi gysylltu â'r ymchwilydd sy’n arwain ar y gwaith, yr Athro Jermaine Ravalier, ar j.ravalier@bathspa.ac.uk.

Bydd Prifysgol Bath Spa a Chymdeithas Brydeinig y Gweithwyr Cymdeithasol (BASW) yn gweithio gyda ni i gynnal yr ymchwil hwn.

Bydd eich holl atebion yn ddienw a byddwn ni’n rhannu'r canfyddiadau ar ein gwefan ar ôl dadansoddi'r canlyniadau.

Yn ddiweddar, wnaethon ni cyhoeddi canlyniadau arolwg peilot 2023, a ddangosodd fod gweithwyr gofal cymdeithasol yn teimlo eu bod nhw’n cael eu gwerthfawrogi gan y bobl a'r teuluoedd y maen nhw’n eu cefnogi. Ond maen nhw hefyd yn teimlo nad ydyn nhw'n cael eu gwerthfawrogi'n ddigonol gan y cyhoedd ac nad ydyn nhw'n cael digon o dâl am y gwaith maen nhw’n yn ei wneud.

Os hoffech chi gael gwybod mwy am arolwg y gweithlu 2023, gallwch chi ddarllen yr adroddiad llawn yma.