Yn fy ngholofnau nesaf, byddaf yn canolbwyntio ar yr hyn rydyn ni'n bwriadu ei gyflawni drwy’r cynllun pum mlynedd sydd newydd ei lansio ar gyfer Gofal Cymdeithasol Cymru. Gallwch ddarllen y cynllun ar ein gwefan.
Y pwnc cyntaf dan sylw yw llesiant y rhai sy'n gweithio ym maes gofal cymdeithasol a'r blynyddoedd cynnar a gofal plant.
Pam mai hwn yw'r pwnc pwysicaf, o'm safbwynt i?
Mae mwy a mwy o dystiolaeth sy'n cysylltu llesiant, galluogrwydd a chymhelliant y gweithlu gofal â chanlyniadau gwell i'r plant, y bobl ifanc a'r oedolion y maen nhw’n eu grymuso ac yn darparu cymorth iddyn nhw.
Yn sgil y pandemig, mae materion iechyd a llesiant y gweithlu gofal wedi codi i'r brig. Mae hyn wedi digwydd oherwydd bod llawer o'r rhai sy'n gweithio ym maes gofal cymdeithasol a'r blynyddoedd cynnar a gofal plant yn dal i deimlo effeithiau'r profiadau affwysol y maen nhw wedi bod drwyddyn nhw ers dechrau'r pandemig.
Ar ben hyn, gwyddom fod prinder dybryd o bobl sy'n gweithio ym maes gofal cymdeithasol a'r blynyddoedd cynnar a gofal plant, sy'n rhoi mwy fyth o bwysau ar y rhai sy'n cael eu cyflogi ar hyn o bryd. I'r rhai sydd â diddordeb mewn gweithio ym maes gofal, mae ystod wych o rolau ar gael ar ein porth swyddi ar wefan gofalwn.cymru.
Er taw'r gweithlu yw ein hased mwyaf gwerthfawr o ran darparu gofal a chymorth o'r radd flaenaf, mae adborth gan weithwyr yn awgrymu nad ydyn nhw'n teimlo eu bod nhw'n cael hanner digon o gymorth na gwerthfawrogiad. Dyw hyn ddim yn beth da o ran eu hymdeimlad o lesiant chwaith.
Byddai'n fanteisiol pe bai gweithwyr gofal yn clywed mwy o sylwadau fel rhai Dr Giles P Croft, cyn-lawfeddyg gyda’r GIG sydd bellach yn anogwr a hyfforddwr, sydd wedi'n helpu ni i gefnogi rheolwyr gofal cymdeithasol a gweithwyr cymdeithasol.
Mae Dr Croft wedi siarad yn uniongyrchol â'r rhai a gafodd gefnogaeth ganddo, trwy ddweud: “Mae pob un ohonoch chi’n cyflawni rôl hollbwysig, mae pob un ohonoch chi’n gweithio'n eithriadol o galed dan amodau anodd ac rwy'n credu bod pob un ohonoch chi’n gwneud gwaith ardderchog. Felly diolch!
“Does dim grŵp arall o bobl, heddiw, yn y DU y byddai'n well gennyf eu cefnogi fel hyn. Rydych chi'n haeddu llawer mwy o gydnabyddiaeth na'r hyn a gewch ar hyn o bryd, ac os yw o unrhyw gysur i chi, fel rhywun sydd wedi ymuno â'r byd hwn o'r tu fas, er mwyn helpu, hoffwn ddweud diolch o waelod calon am bopeth rydych chi'n ei wneud.”
Felly, gan fod llesiant y gweithlu gofal mor bwysig, beth rydyn ni'n mynd i'w wneud dros y pum mlynedd nesaf i helpu gyda hynny?
I'r gweithlu, byddwn yn darparu cymorth, fel cyrsiau Dr Croft, i gynnal a gwella eu llesiant. Mae rhan o'r pecyn hwn yn cynnwys rhaglen gymorth sydd wedi'i chynllunio i roi cymorth emosiynol i bob gweithiwr gofal fel bo'r angen.
Hefyd, rydyn ni'n bwriadu cynnal ymchwil i ddeall mwy am yr heriau sy'n wynebu gweithwyr, a'r ffordd orau o'u helpu.
Byddwn yn darparu adnoddau a chymorth seiliedig ar dystiolaeth i gyflogwyr er mwyn eu helpu i wella llesiant y gweithlu.
I arweinwyr y proffesiwn gofal, byddwn yn darparu arweiniad a chydlyniant i'w helpu i gydweithio â phartneriaid, rhannu ymarfer da a blaenoriaethu mentrau a fydd yn gwella llesiant y gweithlu.
Bydd ymchwil a data yn bwysig hefyd er mwyn dysgu am y ffordd orau o lywio penderfyniadau a pholisïau cenedlaethol sy'n effeithio ar lesiant y gweithlu.
Bydd gwybodaeth o'r fath hefyd yn bwysig i'n helpu i wybod a yw ein gwaith yn gwneud gwahaniaeth, fel y gallwn addasu ein dull i sicrhau ei fod yn parhau'n berthnasol ac yn cael yr effaith a ddymunwn.