Mae adroddiad newydd yn tynnu sylw at yr amrywiaeth yn y ffordd y mae awdurdodau lleol ledled Cymru yn cynllunio’r gweithlu ar gyfer gofal cymdeithasol, a’r angen am fwy o fuddsoddiad i helpu rhai i ddatblygu eu dull gweithredu.
Mae’r adroddiad hefyd yn dangos bod y pandemig Covid-19 wedi cael effaith sylweddol ar amcanion cynllunio’r gweithlu.
Fe wnaethom ni gomisiynu Practice Solutions i ymchwilio i 'gyflwr presennol' cynllunio gweithlu ledled Cymru ac edrych ar yr hyn sydd ei angen yn y dyfodol.
Dysgon ni fod:
- cynllunio’r gweithlu yn amrywio ledled Cymru
- cafodd y pandemig Covid-19 effaith sylweddol ar amcanion
- gall cynllunio gweithlu fod yn llwyddiannus, pan fydd strategaethau corfforaethol a gwasanaethau cymdeithasol yn cyd-fynd a thimau'n cydweithio
- lle mae cynllunio gweithlu wedi'i ddatblygu'n dda, defnyddir technegau ac arferion mwy soffistigedig
- byddai sawl awdurdod lleol yn falch o gael cymorth, mwy o gapasiti ac adnoddau i ddatblygu eu dulliau cynllunio gweithlu
- mae angen symud o gynllunio gweithlu gweithredol i strategol, wedi'i ategu gan fuddsoddiad yn lleol, yn rhanbarthol ac yn genedlaethol.
Dywedodd Sue Evans, ein Prif Weithredwr: “Mae’r adroddiad hwn yn rhoi mewnwelediad gwych i ni o’r dulliau cynllunio gweithlu gofal cymdeithasol presennol yng Nghymru, ond mae hefyd yn amlygu’r cyfyngiadau a’r heriau a wynebir i sicrhau bod cynllunio’r gweithlu yn addas ar gyfer y dyfodol.
“Mae cynllunio’r gweithlu yn rhan allweddol o gyflenwad a galw’r gweithlu, yn seiliedig ar gynllunio gwasanaethau a modelu i ddiwallu anghenion pobl. Ond mae’r adborth a gawsom yn dangos nad yw’r sector yn teimlo ei fod yn deall y gweithlu’n ddigon da ac nad oes ganddo’r data a’r wybodaeth gywir i gynllunio’r gweithlu’n effeithiol.”
Ychwanegodd Sue Evans: “Mae’r argymhellion o’r adroddiad hwn yn cynnig gwelliannau posibl ar lefel leol, ranbarthol a chenedlaethol i ni fel sector eu hystyried a’u cynllunio gyda’n gilydd.”
“Rydyn ni’n gwybod y bydd mwy o bobl yn dibynnu ar ofal cymdeithasol dros yr 20 mlynedd nesaf, felly mae'n hanfodol bod gennym systemau cynllunio gweithlu effeithiol ar waith i fodloni'r galw hwn.
“Rhaid i ni hefyd barhau i wneud yn siŵr fod gennym ni weithlu iechyd a gofal cymdeithasol brwdfrydig, sy’n cael ei ymgysylltu a’i werthfawrogi, ac sydd â’r gallu, y cymhwysedd a’r hyder i ddiwallu anghenion pobl Cymru.”